UEMA Udalerri Euskaldunen Mankomunitateak, hainbat udal eta erakunde publikorekin batera, errenta aitorpena euskaraz egiteko kanpaina jarri du martxan. Ekimenaren helburua da herritarrak animatzea administrazioarekin dituzten harremanak euskaraz egitera, baita errenta aitorpena ere hizkuntza horretan aurkeztera.
Kanpainaren testuinguruan gogorarazi dute 2025eko errenta aitorpena egiteko epea lurraldearen arabera hasiko dela: Araban eta Gipuzkoan apirilaren 7an, Nafarroan apirilaren 9an eta Bizkaian apirilaren 15ean. Kasu guztietan, aitorpenak ekainaren amaiera arte aurkeztu ahal izango dira.
Azken urteotan euskaraz egiten diren errenta aitorpenen kopurua handitzen ari bada ere, datuek erakusten dute oraindik ere alde handia dagoela euskararen ezagutzaren eta errenta euskaraz egiten duten herritarren artean. Hori dela eta, kanpainaren bidez herritarrei gogorarazi nahi zaie administrazioarekin euskaraz jarduteko aukera badutela.
Errenta aitorpena modu desberdinetan egin daiteke euskaraz. Autolikidazio proposamena jasotzen dutenek hizkuntza aldaketa eskatu dezakete dagokion formularioaren bidez, eta horrela aurrerantzean proposamena euskaraz jasoko dute. Bestalde, internet bidezko aitorpena egiterakoan, dagokion atarian euskarazko hizkuntza aukera hautatu daiteke. Telefonoz edo aurrez aurreko arreta jasotzeko hitzordua hartzean ere euskaraz artatua izateko eskaera egin daiteke.
Kanpainaren bidez, UEMAk eta parte hartzen duten erakundeek euskararen erabilera administrazioan indartu nahi dute, herritarrei aukera hori gogoraraziz eta eguneroko izapideetan euskararen aldeko hautua egitera gonbidatuz.
