Lekunberriko Udalak idazkari/interbentzio lanpostua aldi baterako betetzeko deialdia egin du, aldi berean hautagaien zerrenda bat sortzeko helburuarekin. Hautaketa lehiaketa-oposizio sistemaren bidez egingo da eta kontratazioa aldi baterakoa izango da, administrazio-araubidean, lanpostua behin betiko betetzen den arte edo kontratazioaren arrazoia amaitu arte.
Lanpostuak A mailari dagokion ordainsaria izango du, eta hautatutako pertsonak bi hilabeteko probaldia gainditu beharko du.
Deialdian parte hartu ahal izateko, besteak beste, honako baldintzak bete beharko dira: Espainiako nazionalitatea izatea, 16 urtetik gorakoa izatea, Zuzenbideko edo Zientzia Politikoetako gradua edo baliokidea izatea eta euskarazko C1 titulua edukitzea.
Hautaketa prozesuak 40 galderako proba teoriko-praktiko bat izango du, tokiko administrazioari eta sektore publikoari lotutako araudiari buruzko galderekin. Proba gainditzen duten hautagaien merezimenduak ere baloratuko dira, besteak beste administrazio publikoetan izandako esperientzia edo prestakuntza espezializatua.
Interesa duten pertsonek 2026ko apirilaren 30eko 14:00ak arte aurkeztu ahal izango dituzte eskabideak Lekunberriko Udalaren erregistroan, egoitza elektronikoan edo bulegoak@lekunberri.eus helbidean. Deialdiaren oinarriak eta informazio guztia udalaren webgunean eta iragarki-taulan argitaratuko dira.
Deialdi honen bidez, Lekunberriko Udalak udalaren funtzionamendu egokia bermatzeko beharrezkoak diren idazkaritza eta kontu-hartzailetza eginkizunak betetzea du helburu.