Urriaren 29an egindako osoko bilkuran, Udalak 2025eko Kontu Orokorra onartu zuen, gobernu taldearen aldeko botoekin eta oposizioaren kontrako botoekin. Osoko bilkuraren aurretik, bi batzorde, beharrezko azalpenak eta argibideak emateko, eta oposizioko taldearen zalantzei erantzun zaie.
2025eko Kontu Orokorraren datuek udalaren finantza-egoeraren bilakaera positiboa erakusten dute: aurrekontu-emaitza positiboa lortu da, inbertsio-maila handia mantendu da, eta Udalaren finantza-egoera indartzen jarraitu da.
Aurrekontuaren emaitza eta diruzaintzako gerakina
2025eko aurrekontu-emaitza doitua 523,605,13 eurokoa izan da, eta horri 2024ko emaitza positiboaren 125.921,52 euroak gehitu behar zaizkio.
Bestalde, gastu orokorretarako gerakina 556.633,63 euro ingurukoa izan da. Finantza-gaitasun hori oinarri garrantzitsua da etorkizuneko udal-inbertsioei eta -beharrei aurre egiteko.
2,14 milioi euroko inbertsioa 2025ean
Lekunberriko Udalak 2.147.107,25 euroko inbertsioa egin du 2025ean. Jarduketa nagusien artean daude Alde Zaharreko obrak, Ertzillako hodia ordezkatzea, Beigorri parkea birgaitzeko obrak, Ibarberri ikastetxea hobetzeko hainbat jarduketa eta ur-horniduraren digitalizazioa.
2024an eta 2025ean, guztira, 4,18 milioi euro baino gehiago bideratu dira Lekunberriko azpiegiturak, ekipamenduak eta zerbitzu publikoak hobetzeko inbertsioetara.
Inbertsio eta hobekuntza horiek egiteko, Udalak finantza-ahalegin handia egin behar du; izan ere, Udalak aurreratu egin behar izaten du obrak gauzatzeko eta enpresei ordaintzeko dirua. Dirulaguntza gehienak geroago jasotzen dira, jarduketak gauzatu eta justifikatu ondoren. Egoera horrek tentsio puntualak sor ditzake diruzaintzan, eta plangintza ekonomiko eta finantzario egokia eskatzen du. Horri esker, Udalak aurrera atera ditu inbertsio guztiak, eta inbertsio-erritmoari eutsi ahal izan dio udalerriarentzat garrantzitsuak diren hobekuntzak eta inbertsioak gauzatzeko.
Zorpetzea erdira murrizten da gutxi gorabehera
Inbertsio maila horri eutsiz, Udalak bere zorpetzea murrizten jarraitu du. 2025eko abenduaren 31n, udal-zorra 327.698,19 eurokoa zen: 291.655,86 euro finantza-erakundeekin eta 36.042,33 euro IDAErekin.
2023. urtearen amaieran, zorpetzea 658.439,46 eurokoa zen. Beraz, bi urtean %50 inguru murriztu da, eta, aldi berean, inbertsio-maila handia mantendu da.
Zerga-sarreren bilakaera eta EJZ eguneratzea
2025ean, zerga-sarrerak 1.510.475,05 eurora iritsi dira, aurreko urtean baino 337.631,25 euro gehiago; hau da, %28,8ko igoera izan du.
Bilakaera horretan eragin nabarmena izan du EJZren berrikuspenak eta eguneratzeak. Udalak, Tracasarekin lankidetzan, eta zerga-kontrolerako planaren barruan, lehen aldiz berrikusi du jarduera ekonomikoen egoera, eta eguneratu egin ditu zerga bidezko sarrerak, indarrean dagoen araudiaren arabera.
Prozesu horri esker, aurreko ekitaldietako kopuruak erregularizatu ahal izan dira, eta 337.631,25 euroko diru-sarrerak sortu dira. Egindako kudeaketari esker, hemendik aurrera, EJZgatiko diru-sarrera arruntak urtean 70.000 euro gehiagokoak izango dira.
Ibarberriko eraginkortasun energetikoaren proiektua
Ibarberri ikastetxearen energia-eraginkortasuneko proiektua 2024an gauzatu zen, eta, besteak beste, isolamendua hobetzea, plaka fotovoltaikoak instalatzea eta argiztapen-sistemak berritzea ahalbidetu du. Neurri horiekin urtean 50.000 euro inguru aurrezteko modua izango dela aurreikusten da.
Hasierako finantzaketak 1.369.218,43 euro inguruko dirulaguntza aurreikusten zuen. Azkenik, IDAEk 1.111.692,56 euro aitortu ditu. Udalaren ustez, espedientea udal organo eskudunek onartutako agirien arabera izapidetu zen, eta alegazioak aurkeztu ditu hasieran aitortu zuten dirulaguntza eskatzeko.
Finantza-oinarri sendoagoa
2025eko ekitaldiko datuek erakusten dute aurrekontu-emaitza positiboa izan dela, inbertsio-maila handiari eutsi zaiola eta diruzaintzako gerakina igo egin dela; aldi berean, zorpetzea nabarmen murriztu da, eta horrek erakusten du Udalak finantza-oinarri sendoa duela.
Datozen urteetarako, Udalaren helburua izango da kontu publikoen oreka eta inbertsiorako gaitasuna bateragarri egitea, udalerriaren beharrei erantzunez eta Lekunberriko azpiegitura, ekipamendu eta zerbitzu publikoen hobekuntzarekin jarraituz.
Hori guztia, kudeaketa arduratsu eta eraginkor batekin, udalerriaren beharrei egoki erantzuteko.