Lekunberri Sanjuanetako festetarako prestatzen ari da dagoeneko, eta ekainaren 19tik 24ra bitarte herriko kaleak musikaz, tradizioz, gastronomiaz eta adin guztietarako jarduerez beteko dira.
Festak ekainaren 19an, ostiralean, 18:00etan hasiko dira, Erremonte Jaialdiarekin.
Ekainaren 20an, larunbatean, eguna 14:30ean abiatuko da paella lehiaketa eta bazkariarekin. Arratsaldean Garagardo Azokak Herriko Plaza girotuko du dastaketa gidatuarekin eta Folkiss taldearen kontzertuarekin; gauean, berriz, Amatitán de Jalisco mariachi taldearen emanaldia eta MATATON festa izango dira protagonista.
Igandean, ekainaren 21ean, 11:30ean hasiko dira jarduerak, txikientzako puzgarriekin. Ondoren, 2025ean erroldatutako bizilagun berriei ongietorria egingo zaie eta Larraun Kantuz taldeak herriko kaleak musikaz beteko ditu. Arratsaldean Iruñeko gaiteroek lagundutako Erraldoi eta Kilikien konpartsaren kalejira izango dugu.
San Juan bezpera, ekainaren 23a, asteartea, festetako egun berezienetako bat izango da. Jardunaldiari 17:00etan emango zaio hasiera herri kirol jokoekin, LH2tik DBH2ra arteko haur eta gazteentzat. Arratsaldean Martillo Txiki batukadaren kalejirak giroa berotuko du, eta 20:30ean piztuko da San Juan bezperako sua Alde Zaharrean, txistorrada, barrikotea eta Aralar Udal Musika Eskolaren musikarekin.
Azkenik, ekainaren 24an, asteazkenean, San Joan eguna ospatuko da. Eguna 09:30ean hasiko da txistularien dianarekin; ondoren, Meza Nagusia egingo da eta eguerdian bi hitzordu jendetsu izango dira: jubilatuen bazkaria eta Herriko Plazako herri bazkaria.
Lekunberriko Udalak herritarrak eta bisitariak festetan parte hartzera animatu ditu, tradizioa, kultura eta elkarbizitza uztartzen dituen egitarau zabal batez gozatzeko.
