Gaur, irailaren 2an, Lekunberrin Iturriburuko 36 etxebizitzen aurkezpen ekitaldia egin da, hainbat erakundetako ordezkarien parte-hartzearekin.
Ekitaldian parte hartu dute, besteak beste, Espainiako Gobernuko Etxebizitza eta Hiri Agenda ministroak, Espainiako Gobernuak Nafarroan duen ordezkariak, CASA47 enpresa publikoaren zuzendariak, Nafarroako Gobernuko Etxebizitza zuzendariak, NASUVINSAko ordezkariek, alkateak eta Lekunberriko Udaleko zenbait zinegotzik.
Iturriburuko etxebizitzen proiektuak etapa berri bat hasi du orain, baina 2008ko higiezinen krisian du jatorria, sustatzailearen porrotak 36 etxebizitzak amaitu gabe utzi zituenean. Urteetan abandonatuta egon ondoren, eraikina egoera tamalgarrian zegoen, eta hau inguruko bizilagunek zuzenean jasan dute.
Gainera, urte hauetan, bizilagunak Iturriburuko eraikinaren egoera konpontzeko lanean aritu dira Udalarekin batera, hainbat aukera eta bide aztertuz. Elkarlan horrek, SAREB, NASUVINSA, Nafarroako Gobernuko Etxebizitza Departamentua eta Espainiako Gobernuaren lankidetzarekin, urteak blokeatuta zeramatzan proiektu baten konponbiderantz aurrera egitea ahalbidetu du.
Eraikina birgaitzeko lanak 2024ko irailean hasi ziren, eta, gaur egun, proiektua errealitate bihurtu da. 36 etxebizitzak arrazoizko alokairurako erabiliko dira, eta CASA47 enpresa publikoak kudeatuko ditu.
Gaur egindako ekitaldia, beraz, etapa berri baten hasiera da, urteetan itxita eta erabilerarik gabe egon den eraikin batentzat. Horrela, etxebizitzak herritarren eskura jarriko dira eta alokairuko etxebizitza eskuragarrien eremuan sartuko dira.
Lekunberriko Udalarentzat, etxebizitza eskubidea da, ez negozioa, eta Iturriburuko proiektuak erakusten du, administrazioen arteko lankidetzaren bidez eta herritarren inplikazioarekin, urteetan blokeatuta egon diren proiektuei irtenbidea ematea posible dela.
Lekunberriko etxebizitza eskuragarria bultzatzen jarraitzen dugu
Iturriburuko etxebizitzak urrats garrantzitsuak dira, baina Lekunberriko etxebizitza-politika ez da hemen amaitzen. Udalak lanean jarraitzen du erabilera-lagapeneko etxebizitza-eredu kooperatibo bat bultzatzeko.
Ildo horretan, ekainean bilera bat egin zen eredu kooperatiboari buruzko informazioa herritarrei emateko. Uztailean, berriz, herritarren interesa ezagutzeko formulario bat ireki zen, eta, orain arte, 30 pertsonak erakutsi dute proiektuan interesa.
Hemendik aurrera, Udalak hurrengo urratsak zehazten jarraituko du, interesatuekin eta Nasuvinsarekin batera, etxebizitza-eskaintza zabaltzen jarraitzeko eta pertsona gehiagok Lekunberrin bizi-proiektua garatu ahal izateko.
Gaurko ekitaldiak erakusten du Udalak lanean jarraitu nahi duela etxebizitza eskuragarri bat eskuratzeko. Iturriburuko 36 etxebizitzek eta etxebizitza eredu kooperatibo bat bultzatzeko emandako pausoek aurrerapauso garrantzitsuak ekarri dituzte, baina oraindik bide luzea dago egiteko etxebizitza eskaintza zabaltzeko eta herritarren beharrei erantzuteko.
